Нема систем преку кој може да се објасни неговиот актерски систем. Ненад Стојановски, едноставно, беше карактерот на ликовите што ги играше…- напиша драматургот Александра Бошковска
„Дипломирав во класата на проф. Илија Џувалековски со просечна оценка 8,37 и 10 по главниот предмет – актерска игра“, напиша Ненад Стојановски. Денес ќе полнеше 70 години. Големиот актер кој беше идол на многу генерации е роден на денешен ден во 1952 година во Скопје. Почина на 14 јули 1998 година.
Сцена од филмот „Пресуда“
– Нема научна методологија која може да одговори на прашањата зошто Ненад Стојановски е најголемиот актер во Македонија, зошто беше толку популарен, зошто се врескаше по него како по рок-ѕвезда. Беше нашиот херој, секој негов лик беше наш Џемс Бонд – за него навивавме, во него бевме вљубени, го имитиравме… Публиката го преполнуваше Драмски поради него, учејќи напамет реплики, монолози, интонации, гестови… Еден голем процент од таа публика се запиша на Факултетот за драмски уметности за да работи со него, покрај него… Нема ниту систем преку кој може да се објасни неговиот актерски систем. Тој, едноставно, беше карактерот на ликовите што ги играше… – напиша драматургот Александра Бошковска во монографијата „Ненад Стојановски – споменар“, објавена во 2005 година, која таа ја уреди заедно со Викторија Рангелова.
Во неа, меѓу другите, зборува и Слободан Унковски, кому Стојановски му беше омилен актер. Тој вели:
„Постојано сум имал отпор да го гледам кај други режисери. Љубомора? Ја сакав својата идеја за тоа кој и како треба да игра. Не ми паѓаа лесно неговите одушевувања со други режисери. Мислев дека е некако само мој, дека е еден вид мој производ, што не е точно. Еден вид моја заштитан марка. Би сакал да е точно. Но, тој беше само свој, докрај посветен на тоа што го работи, со комплетно автентичен процес на креирање на ролјата. Го играше тоа што го мислеше, што го чувствувашпе и препознаваше. Ако не знаеше како, одеше кај авторот (многу често Горан Стефановски) или дружејќи се со мене се обидуваше заедно да дефинираме каде би можеле да го развиеме ликот. Понекогаш ќе се откинеше од процесот на пробување и ќе поминеше некое време на други места, за да се врати некако очистен и подготвен за натаму.“
Ненад Стојановски беше театарски, филмски, телевизиски актер. Играше во: Време, живот, Среќна Нова ’49, Диво месо, Болва в’ уво, Трговецот од Солун, Илинден, Трст виа Скопје, До-ре-ми, Од зад грб. По членувањето во Детската радио-драма и во експерименталните аматерски драмски состави „Кактус“ и „Кај Св. Никита Голтарот“, а по завршувањето на Факултетот за драмски уметности, Стојановски настапувал на сцената на Драмскиот театар во Скопје, а гостувал и на повеќе други сцени.
Повеќе пати настапувал на Дубровничките и Сплитските летни игри, а учествувал и во повеќе проекти при Драмата на Македонскиот народен театар. Добитник е на голем број високи сојузни и републички награди и признанија: две Стериини награди, највисокото општествено признание на Македонија, Наградата „11 Октомври“, Наградата на „Млад борец“, на ревијата „Екран“ за најпопуларно филмско и ТВ лице и на Театарските игри „Војдан Чернодрински“ во Прилеп.
Сцена од „Диво месо“
Во 1985 година е прогласен за глумец на годината според ревијата „Екран“, добитник е на Наградата на весникот „Дневник“ од Нови Сад, добитник на „Златен медал“ на Театарските свечености во Шабац, за улогата во претставата „Кула Вавилонска“.
Филмографија
1975 Илинка ТВ-филм Дејан
1976 Цимерите од соба 306 ТВ-филм
1977 Пресуда ТВ-филм
1977 Сослушувањето на железничарот ТВ-филм
1981 Лет во место ТВ-филм Михајло
1982 Илинден ТВ-серија
1983 Ликвидатор ТВ-филм
1983 Записник ТВ-филм
1984 Јуначко колено ТВ-серија
1984 Лет во место ТВ-филм
1984 Диво месо ТВ-филм
1984 Дупло дно ТВ-филм
1984 Камчевци ТВ-серија
1985 На наш начин ТВ-филм
1985 Од зад грб ТВ-филм
1985 Тетовирани души ТВ-филм
1985 Трговецот од Солун ТВ-филм
1985 Бушава азбука ТВ-серија
1986 Состојба на инфаркт ТВ-филм
1986 Среќна нова ’49 ТВ-филм
1987 Трета доба ТВ-филм
1987 Смртта на Дантон ТВ-филм
1987 Хај-фај ТВ-филм Матеј
1988 Скопски сновиденија ТВ-филм
1988 Мојсие од моето масло ТВ-филм
1988 Црна дупка ТВ-филм Силјан
1989 Тврдокорни ТВ-серија
1989 Еурека ТВ-серија
1990 Трст виа Скопје ТВ-серија Кирил
1990 До, ре, ми ТВ-серија
1990 Кула вавилонска ТВ-филм
1991 Опстанок ТВ-серија
1991 Болва в’ уво ТВ-филм
1991 Царуга ТВ-филм
1992 Заминување од Пасквелија ТВ-филм
1992 Време, живот ТВ-филм
1992 Сили во воздухот ТВ-филм Миле
1992 Чернодрински се враќа дома ТВ-филм
1993 Грев или сприцер ТВ-филм
1994 Прекалени ТВ-серија
1997 Ojdipus Tiranos Sofocleus ТВ-филм
1997 Добредојдовте во Сарајево ТВ-филм
1998 ТВ Театар ТВ-серија
1998 Збогум на 20-тиот век
1998 Бегство ТВ-филм
1999 Време, живот ТВ-филм
Ненад Стојановски освои бројни награди:
Награда на Фестивалот „Стериино позорје“ за улогата на Андреја во претставата Диво месо (Нови Сад, 1980);
Награда за најдобар млад глумец на Македонскиот театарски фестивал „Војдан Чернодрински“ за улогата на Козаков во претставата „Бркотница“, (Прилеп, 1981);
Награда за најдобра епизодна улога на „Војдан Чернодрински“ за улогата на Козаков во претставата Бркотница (Прилеп, 1981);
Награда за глумечко остварување на „Војдан Чернодрински“ за улогата на Пиги во претставата „Среќна Нова ’49“ (Прилеп, 1985);
Награда „11 Октомври“ за улогата на Јаков III во претставата „Дупло дно“ (1985);
Награда за најдобро глумечко остварување на ревијата „Екран“ за улогата на Пиги во претставата “Среќна Нова ’49“ (1986);
Награда од списанието „Дневник“ од Нови Сад за најдобро глумечко остварување на Фестивалот „Стериино позорје“ за улогата на Миле во претставата „Сили во воздухот“ (Нови Сад, 1989);
Златен медал на Театарските свечености „Љубиша Јовановиќ“, за улогата на Дамјан во претставата „Кула вавилонска“.
(С.Ѓ.)
